شعب سلبى إبن ...

طبعا أنا ما ليش فى رسم الكاريكاتير و عشان كده لو جاتلى فكرة كاريكاتير هاضطر أكتبها كلام و حاتضطر تقراها بدل ما تشوفها و ده طبعا أمر مختلف جدا.. ما علينا للضرورة أحكام و عشان كدة غمض عينك (بعد ما تقرا مش دلوقت) و حاول تتخيل إتنين من البسطاء الغلابة .. و حيث إن الغلابة فى بلدنا يعملولهم 90% و البسطاء منهم ييجى 80% يبقى مش ها تغلب فى إنك تتخيل بتاع عشرة عشرين بس ما تحاولش تبص فى المراية لأن زى ما حوضح بعد كده إنت ما تنفعش تبقى منهم (إبسط ياعم طلعت من العشرة فى المية)..
نرجع للإتنين اللى كنا بنحكى عنهم .. أنا متهيألى كده إنه ممكن نتخيل إنهم عمال بناء قاعدين على تشوينة رمل فى وقت الراحة و نازلين أكل فى شقتين فول من أبو 75 قرش وواحد منهم ماسك ورقة الجورنال اللى كان ملفوف فيهاشقتين الفول و مكتوب فيها "فلان من حركة ماعرفش إيه يقول إن الشعب المصرى قد فرط فى حقوقه".. و إرسملى بقى باللونة فوق دماغ الجدع اللى ماسك الجورنال إعزنه بيقول "تصدق ياللا بيقولك إن لنا حقوق!!".. بس كده خلاص فتحلى عينك بقى و قوللى إيه الغلط أو اللى مش منطقى فى الكاريكاتير ده؟؟

أولا إيه إحتمال إن حتى واحد من الإتنين دول يكون بيعرف يقرا أو حتى يفك الخط؟
ثانيا لو فرضنا إن واحد منهم كان دخل مدرسة و إتسرب منها بعد ما لحق يتعلم يفك الخط. إيه إحتمال إنه يخطر بباله أو يداعب خياله إنه إبان بحثه عن حتة مخلل تكون ضايعة فى قعر الورقة إنه يقرا الكلمتين اللى مكتوبين فى جرايد الناس الفاضية اللى معاها فلوس تشترى ورق ملحوس حبر "ده حتى بتسوخ الهدوم".

معناتو إيه الكلام ده؟؟

إن مابين إخوانا بتوع التغيير و بين الشعب اللى عايزينو يقف وراهم و يسندهم و ما يفرطش لا مؤاخذة فى حقوقه مسافات و حيطان عالية و قناية و بحر و مقلب زبالة بيربو فيه خنازير .. و الشعب اللى همه فى شقة الفول و شقى النهار و شقاوة العيال و الشق اللى فى الحيطة اللى حاتقع على دماغه أو تبعد عنها و تسيبه فى الطل .. الشعب ده مش هايعدى القناية و يخوض البحر و ينط على الحيطة و يمشى المسافات فى نقرة الحر عشان يقف ورا ناس عايزينه ييجى يتسحل معاهم على الأسفلت و يتلزق على قفاه و يتكوم مع عشرة زيه فى بوكس ها يروح بيه على مطرح الداخل فيه خارج و مش راجع تانى و كل ده قال إيه عشان حقوقه.. إلا لا مؤاخذة هو إحنا لينا حق ضايع و إحنا ما نعرفش؟

الموقف ياسادة و الرؤية مختلفين من على تشوينة رمله فى حر 6 أكتوبر أو الشيخ زايد أو من فسحاية مصنع غزل واقف أو من غيرها عن الموقف و الرؤية من ورا نضارة على كرسى مخلع قدام شاشة كمبيوتر جايبه بالقسط .. بس أهو قادر تدفع القسط و قادر تخش على الإنترنت و عندك وقت و فراغ تقرا بوستات فى بلوج و يمكن تعملك واحد تضيع وقت تانى تكتب فيه.. الأهم من كده كان عندك فرصة تتعلم تقرا و عندك فرصة تقرا بعد ما إتعلمت و أخيرا إكتشفت إن لك حق و عايز تنزل الشارع تطالب بيه بس لأن الحق مش هايرجع لو إنت أو عشرة من أمثالك نبحو صوتهم و همه بيطلبوه دورت على اللى يسندك و لمه ما جاش لعنت سنسفيل جدوده عشان شعب إبن ... مفرط فى حقوقه.

الموضوع إنك محتاج تقوم من ورا الكمبيوتر و تلبس الترنج اللى بتلعب بيه كورة يوم الجمعة و تطلع من بيتك تلف من حولين مقلب الزبالة و تحط منديل على وشل لحسن تتلطش فيروس خنازير يخلص على مسيرتك النضالية بدرى و بعدين تنط الحيطة و تعدى البحر و تخطى القناية و تمشى المسافة و تروح تقعد على تشوينة الرمل حنب صاحبنا بس ما تبصلوش فى شقة الفول و غالبا هو ها يعزمك على كوباية شاى مغلى على قلاحتين درة و شوف بقى تبدأ منين تشرحله إن له حق و إن حقه هاياخده لو هو و كل اللى زيه نزلوا و وقفوا و طالبوا بيه.

طبعا الموضوع أكبر من كده و أكبر حتى من البحر و القناية و القصة دى و القعدة على تشوينة رمل عمرها ما هتكون كفاية.. الفكرة إن إتهام الشعب بالسلبية و التفريط فى الحقوق هو ترييح دماغ و تخلى عن المسئولية.. لأن كل ميزة بييجى معاها مسئولية و فى بلد 70% منه أميين و الباقى أكترهم نص أميين بشهادات.. التعليم و إدراك إن لك حقوق دى مزايا بتحملك مسئولية.. طبعا أنا ما عنديش برنامج واضح للطريقة اللى ممكن نتحمل بيها مسئولياتنا بس لو نكر سوا يمكن نلاقى.