حدوتة عربية ..

تخيل كده إن جدك لما مات فات لأبوك حتة أرض .. قوم فى يوم أغبر دخل الأرض بلطجى حط إيده على حتة منها .. طبعا أبوك ما سكتش و قامت بينهم عركة .. إتلم فتوات البلد و حراميتها اللى موالسين مع البلطجى و همه فى الأصل اللى إتفقوا معاه يمكنوه من الأرض .. و عشان يفضوا العركة قالوا إحنا نعمل مجلس عرب و نحل هاذوها المشكلة .. و فى المجلس المضروب اللى ما كانش لحد من أهل البلد فيه كلمة الفتوات إتفقوا إنهم يقسموا الأرض بالنص بين أبوك و البلطجى .. أبوك طبعا ما عجبوش الكلام ده و قامت العركة تانى .. جه البلطجى راح فاتح دماغ الوالد مسيح دمه و حوط على نص الأرض ..

و بعد كام سنة لبد البلطجى لأبوك فى الدرة و نشه عيار جاب أجله و عنها و راح مكوش على الأرض بحالها .. و من أياميها و إنت ياولداه داير على المحاكم تدور على حقك فى الأرض .. و بعدين و لاد الحلال .. اللى همه ذات نفس الفتوات قالولك إنه ما فيش حل غير إنك تكتب عقد مع الفتوة تعترف فيه إن نص الأرض من حقه عشان يسيبلك النص التانى .. بس الفتوة مش راضى و قالك ما أنا قاعد باكل و أشرب و أئح فى الأرض براحتى أسيب نصها بتاع إيه .. قوم برضه ولاد الحلال قالولك طب سيبله تلتين الأرض و إحنا نحنن قلبه عليك عشان يسيبلك التلت اللى فاضل .. و حتى هاذوها اللحظة البلطجى حبة يقول موافق و حبة يقول لأ ما لوش عندى حاجة..

بالعقل و المنطق كده المفروض جنابك تعمل إيه؟

1 – تماين على أمل إنك تطلع بحتة من الأرض على ضمانة الفتوات و الحرامية و ثقة فى نزاهة و شرف البلطجى..
2 – تفضل مرابط جار الأرض و تزقل البلطجى بالطوب و تقرف اللى خلفوه فى عيشتهم لغاية ما يطلع من الإرض و معلش ها تاخدلك كل يومين علقة ..

طبعا فاهمين أنا بتكلم عن إيه .. و طبعا ها يطلع فلحوص يقوللى بس الصراع العربى الصهيونى أعقد كتير من الحدوتة الخايبة بتاعتك دى و العلاقات الدولية بتقوم على شرعية قرارات الأمم المتحدة و أبصر إيه..

مع إحترامى لكلام أى فلحوص .. برضه أصل الحكاية و خلاصتها ما يفرقش كتير عن الحدوتة .. الأرض فى الأصل لينا وارثينها أبا عن جد و وجود البلطجى عليها غير شرعى و باطل .. و قرارات القلل المنتحرة ما لهاش شرعية دولية لأن المتحكم فيها خمس دول ما حدش إختارهم و خلاهم ينوبوا عن دول و شعوب العالم فى تقرير مصيرهم و مش من حقهم أن يعطوا مالا يملكون لمن لا يستحق.. أما كل المعاهدات اللى حكامنا بصموا عليها بحوافرهم فمجرد ورق يمسحوا بيه لا مؤاخذة زير آسس بعد الإستعمال .. و ده لأن ما حدش كان خد رأينا فى المعاهدات دى و لأن اللى بصموا عليها ما حصلش إننا إخترناهم أو بايعناهم و لو كان ليهم ظل من شرعية يبقى الشرعية دى إنتهت فى لحظة ما فرطوا فى حقوقنا..

و يمكن فلحوص تانى يقول .. ما إحنا عارفين الحكاية دى.. جاى تعيد فيها تانى ليه؟

يا راجل .. عارفينها؟ .. بأمارة إيه ؟ .. بصراحة مش باينلكم عارفينها .. أو عارفين و ناسيين .. أو يمكن فاكرين بس عاملين ناسيين .. أمال تسميه إيه كلام الناس الأيام دى ؟ .. و تسميه إيه الهبل اللى حصل فى زيارة الحاج بن حسين أوباما اللى الناس أغمن عليها من الفرح لما قالك إنه هيعمل جهده لتحقيق حل الدولتين .. هوه مش حل الدولتين ده يعنى نسيب للبلطجى أكتر من نص أرضنا و ده لو رضى و سامح؟ ..

فلحوص تالت بقى يتنحرر و يزع فيه .. إنت يا جدع إنت عايزنا نحارب تانى و ألا إيه؟ .. ده الريس بحكمته حافظ على البلد تلاتين سنة من غير حرب .. هو إحنا حمل حروب تانى؟

بذمتك ما إنتش مكسوف من نفسك ؟ .. طب وحياة طنت فكيهة و إن شالله أعدمها بدرى إن 90% من البلد المريضة دى كانوا عايشين أيام الحرب أحسن ميت مرة من أيامينا الغبرة دى .. ده اللى يشوف حال البلد و خرابها بعد التلاتين سنة حكمة و سلام يقول إنها خارجة من حربين و 3 مجاعات على عشرين زلزال و كام وباء مستوطن.. يعنى بعقلك كده .. الضنك و الهم اللى إحنا فيهم دول يستاهلوا ندفع تمنهم إننا نفرط فى أرضنا و عرضنا و نتذل للى ما يسواش؟

فلحوص رابع إنما من النوع المثقف القارى يقول .. يا بنى بلاش شعارات خايبة .. السياسة هى فن الممكن .. إحنا حالنا دلوقت ما يسمحش بإننا نطالب بحقنا كله .. و العقل بيقول ما لا يدرك كله لا يترك جله..

ما شاء الله.. يعنى هو حالنا دلوقت مستحيل أكتر من حال اليهود من قرن فات؟ .. و مع ذلك همه فضلوا يبرموا لحد ما طلعوا بدولة من الهوا من غير ما يكون لهم حق فيها .. يعنى همه اليهود أحسن مننا فى إيه ؟ .. ده حتى إحنا عايزين حقنا و مش عايزين ناخد حاجة مش لينا .. و إذا كان الوقت مش مناسب أدينا صابرين و مستنيين لحد ربك ما يعدلهالنا بناس غير الناس و زمن غير الزمن و إن نفذ أمر كريم فى عبده أولادنا و أحفادنا من بعدنا .. بس إحنا ماننساش حقنا و ماننساش الحدوتة .. بسيطة بس فيها الخلاصة .. لأن الحقوق مش محتاجة تتحكى فى كلام كتير و لأنها واضحة بنفسها .. و حقوق الشعوب يا سادة لا تسقط بالتقادم..

ملحوظة أخيرة .. عارف إن الكلام أعلاه ممكن يكون تبسيطى جدا أو حتى ساذج .. بس الأيام الأخيرة علمتنى إنى أنزل بسقف توقعاتى بخصوص عقلية الناس اللى محتاجين يتقال لهم الكلام ده .. كل أملى إن واحد أو إتنين منهم يعدى هنا يمكن أنجح فى تذكيره بحقيقة الحق اللى لينا فعلا و اللى بالإمكان نوصله فى يوم من الأيام و مش مضطرين نبيعه رخيص لأنه عمره ما رخص لكن إحنا اللى بيعدى علينا أيام بنرخص فيها..